電影中嘅賭神係周潤發——黑大褸、「gel到行」嘅all back髮型，再加上一片薄薄嘅朱古力。現實中嘅賭神又係點呢？登、登、登、櫈……各位觀眾，有請真正嘅賭神﹕金——撈——詹！
去永利美高梅 只賭百家樂
無錯，人稱「金勞詹」嘅立法會議員詹培忠，可能真係「gel」唔到「all back」髮型，亦唔適宜食太多朱古力，但金勞詹喺賭博方面嘅成就，真係「發過周潤發」，短短兩日就贏咗1.5億！正當股市彌漫住一片愁雲慘霧，身為金融服務界代表嘅詹培忠仍然有另類方法賺錢。但各位朋友緊記，千祈唔好抱住「生意淡薄，不如賭博」嘅心態，唔係人人都可以好似金勞詹咁好運……
「你可以寫，詹培忠一向係立法會最叻嘅賭神。」一向牙擦嘅詹培忠，從不掩飾自己好賭嘅性格，佢嘅足迹更遍及拉斯維加斯各大賭場，亦都贏過好幾次大錢，但講到今次喺兩日內贏到1.5億，詹培忠都忍唔住話「好犀利」、「非常難得」，皆因今次係佢贏得最多嘅一次，「喺澳門有識賭嘅人仲話我叻過電影賭神！」
出入賭場幾十年，詹培忠有一句12字真言﹕「贏谷、輸縮、心清、數熟、夠毒、知足。」而自己每次都只係賭「百家樂」，唔會玩其他。咁究竟澳門邊間賭場咁唔好彩，畀詹培忠贏到咁多錢呢？
話說今年暑假，自動當選嘅詹培忠毋需要為競選奔波，可以離港嘆世界。由於身體唔多好，免得長途跋涉，決定去澳門度假，去咗永利同美高梅MGM兩間賭場玩兩手。詹培忠話，自己以往一直去開拉斯維加斯，但而家澳門已經引入美資，所以佢每兩個月就會過澳門一次，仲要每次都係坐直升機，花十多分鐘就到，到澳門後仲有人幫佢安排好一切，賭場亦會為佢開一間「VIP房」，一個人一張賭枱，毋須同人迫。
落場20次 只輸3次
詹培忠喺兩間賭場前後花咗40小時，總共落場20次，只係輸咗3次，贏足17次，「平均每小時贏375萬」。Emily當然想問吓佢贏錢過程、每鋪賭幾大，點知詹培忠就話﹕「你唔識（賭），唔應該畀你寫，寫到出嚟亂晒籠……畀啲市民睇，（以為）呢個議員咁爛賭，事實我唔鼓勵人賭。」
訪問期間，詹培忠不斷強調佢唔會鼓勵人賭錢，「因為澳門賭場一年賺咁多錢，政府抽稅都有近400億，錢從何來，何嚐唔係賭仔來？」不過，講完之後還是忍唔住推翻自己﹕「呢個世界，叫人唔好賭係呃人，做人乜嘢都賭！因此要學精靈啲、學叻啲，散戶都好，學識保障自己權益，知自己做緊乜事，唔好影響其他人生活水平質素同家庭！」講講吓賭，竟然畀佢拉咗去講最近嘅雷曼兄弟破產，「要輸得起，千祈唔好唔負責任。」金勞詹呢一句說話，究竟係講賭錢，抑或講投資呢？
分享完贏大錢嘅經過後，Emily都想知「金撈詹」有無試過輸到清光嘅時候，不過，一向牙擦擦嘅佢當然唔會咁「失威」喺人前認輸，淨係肯講：「賭錢實有輸贏。」至於輸得最勁嘅一次涉及幾多錢？「金撈詹」囂囂張張咁話：「你問呢啲嘢無用！」
其實，Emily都唔係第一次寫「金撈詹」贏大錢嘅故仔，過去兩年，佢久唔久同傳媒飯局時，都會講吓自己嘅賭場「威水史」，閒閒地都贏幾百萬美元 。記得由佢自己把口講出嚟，贏得最少嘅一次，就喺去年澳門 威尼斯人賭場開幕，半個鐘內只贏得80萬元，佢嫌贏得少便走人，仲話以後唔再幫襯
-----------------------------------關於
詹培忠（1946年－），現任香港立法會議員，廣東潮州人。2004年以金融服務界功能組別進入立法會。2008年，競選連任立法會，結果在沒有對手下自動當選，成功連任。
詹培忠9歲時到香港，新法書院中學畢業。其後曾往金邊（柬埔寨首都）做生意。23歲時開始炒股票。1980年因操控佳寧股價，使其狂飆16倍而成名，被稱「金牌莊家」（但這種做法現時則屬違法）。1991年至1998年曾代表金融界及金融服務界為立法會議員。1998年因被控偽造文件罪名成立，被判入獄而失去議員資格。1999年出獄。
2005年5月，詹培忠宣佈參與2005年香港行政長官選舉，成為第二位準候選人，但最終未能取得100位選舉委員會成員提名（只取得21票），而宣佈放棄參選。
2005年12月21日，就香港政府2007年、2008年行政長官及立法會的選舉方案，詹培忠在辯論時仍堅稱會投棄權票，但在第一個議案表決時則投了贊成票。
*以上材料皆取於互聯網，為個人參考。
發表文章
